Fréttir

22.júlí 2009

Geisladiskar Ísafoldar eru nú fáanlegir á gogoyoko.com

11.júní 2009

Eftir festivalið "Við Djúpið" mun Ísafold leika brot af efnisskrá sinni í Reykjavík.

Kjarvalsstaðir 25.júní (fimmtudagur) kl.20:00
Almennt verð: 1.500 kr.
Eldri borgarar og námsmenn 1.000 kr.

15. apríl 2009
Ísafold á tónlistarhátíðinni "Við Djúpið" 18.-23.júní

 TÓNSKÁLDIN FUNDIN

Nýlega skilaði dómnefnd úrskurði sínum í samstarfsverkefni tónlistarhátíðarinnar Við Djúpið, Ísafoldar kammersveitar og Rásar 1. Dómnefndin tók sér lengri umhugsunarfrest en til stóð þar sem umsóknirnar voru margar og góðar. Valin voru 3 ung tónskáld til þátttöku. Það voru þeir Högni Egilsson, Viktor Orri Árnason og Gunnar Karel Másson sem boðið var að semja verk fyrir kammersveitina. Nánar má lesa um verkefnið hér.

Sérstök áhersla er lögð á nýjar tónsmíðar á hátíðinni þetta árið og verður eitt merkasta tónskáld dana, Bent Sørensen, tónsmíðakennari á hátíðinni.  Ísafold mun þá einnig flytja verk eftir hann.

Efnisskrá og tónleikar á tónlistarhátíðinni Við Djúpið má finna hér

19. desember 2008
Íslensku tónlistarverðlaunin, tilnefning

Íslensku tónlistarverðlaunin sem afhent verða snemma á árinu 2009 hafa nú tilkynnt tilnefningarnar.  Hljómplatan "all sounds to silence come" sem Ísafold gaf út snemma á árinu er meðal tilnefninga sem plata ársins.

Tilnefningarnar eru eftirtaldar:

Höfundur ársins
Bragi Valdimar Skúlason – fyrir textagerð á plötunum Gilligill og Nýjasta nýtt
Sigur Rós – fyrir lagasmíðar á plötunni Með suð í eyrum við spilum endalaust
Áskell Másson – fyrir tónverkið Ora
Emilíana Torrini – fyrir lagasmíðar á plötunni Me and Armini
Jóhann Jóhannsson – fyrir tónlist á plötunni Fordlandia

Tónverk ársins
Ora – Áskell Másson
Stjórnarskrá íslenska lýðveldisins – Karólína Eiríksdóttir
Sinfónía nr. 4 – John Speight

Lag ársins
Þú komst við hjartað í mér – Toggi/Bjarki Jónsson/Páll Óskar
Gobbledigook – Sigur Rós
Inní mér syngur vitleysingur – Sigur Rós
Kalin slóð – Múgsefjun
Pabbi minn er ríkari en pabbi þinn – Bragi Valdimar Skúlason

Tónlistarflytjandi ársins
Anna Guðný Guðmundsdóttir – fyrir heildarflutning á tónverkinu Tuttugu tillit til Jesúbarnsins eftir Olivier Messiaen
Björk – fyrir tónleika í Langholtskirkju og Náttúrutónleika í Laugardalnum
Þursaflokkurinn og Caput – fyrir tónleika í Laugardalshöll
Sigur Rós – fyrir tónleika í Laugardalshöll og Náttúrutónleika í Laugardalnum
Dr. Spock – fyrir tónleikahald á árinu

Rödd ársins
Emilíana Torrini
Páll Óskar Hjálmtýsson
Egill Ólafsson
Katrín Mogensen
Jón Þór Birgisson

Popp/rokkplata ársins
Með suð í eyrum við syngjum endalaust – Sigur Rós
Me and Armini – Emilíana Torrini
Falcon Christ – Dr. Spock
Jeff Who? – Jeff Who?
Karkari – Mammút
Skiptar skoðanir – Múgsefjun
Fjórir naglar – Bubbi Morthens

Sígild og samtímatónlist
Apocrypha – Hugi Guðmundsson
Fordlandia – Jóhann Jóhannsson
Demoni Paradiso – Evil Madness
Ró – Mógil
All sounds to silence come – Kammersveitin Ísafold

Djass
Fram af – Ómar Guðjónsson
Í tímans rás – Villi Valli
Blátt ljós – Sigurður Flosason

Bjartasta vonin
Valin af dómnefnd í samvinnu við fulltrúa ÍTR
Klive
Agent Fresco
Retro Stefson
Dísa
FM Belfast

Myndband ársins
Verðlaunin eru veitt án tilnefninga. Myndböndin aðgengileg á vísi.is.

Umslag ársins
Verðlaunin eru veitt án tilnefninga.

30. nóvember 2008
Kraumur veitir "all sounds to silence come" viðurkenningu

Tónlistarsjóðurinn Kraumur hefur valið 6 plötur af 20 tilnefndum sem plötu ársins. Plata Ísafoldar "all sounds to silenec come" er ein þeirra 6 sem urðu fyrir valinu. Þessi viðurkenning felur í sér aukna kynningu en sjóðurinn mun taka að sér að kynna plötuna erlendis sem geta skapað mikilvæg tengsl og möguleika á erlendum markaði.

sjá frétt...

Myndir og meira....

Um verðlaunin á Wikipedia...

30. nóvember 2008
Kreppan og Ísafold

Ísafold er eins og flest allt á Íslandi í dag í mikill fjárhagsóvissu og var því ákveðið að fresta tónleikahaldi fram til 2009.  Upphaflega var á dagskrá að vera með spennandi tónleika á dagskrá í lok nóvember þar sem Pétur Ben, Ólöf Arnalds og Nico Muhly vinna með Ísafold.  Þessum tónleikum hefur verið frestað fram á vor þegar fjárhagsástandið skýrist.  Starfsemi Ísafoldar er mjög háð styrkjum og eins og gefur að skilja hefur styrkjaumhverfið á Íslandi breyst svo um munar.

14. september 2008
Reykjavíkurborg styrkir Ísafold

Ísafold var útnefnd Tónlistarhópur Reykjavíkurborgar 2008 í upphafi árs en borgin hefur nú sýnt sveitinni stuðning í annað sinn með 500.000 kr. styrk til að standa straum af auknum kostnaði vegna tónleikahalds.

Listasafn Reykjavíkur & Ísafold

Samstarf  milli Ísafoldar og Listasafns Reykjavíkur er staðfest.  Tónleikasalur hljómsveitarinnar verður héðan í frá Kjarvalsstaðir og er það léttir fyrir hljómsveitina að geta gengið að tónleikahúsnæði vísu.  Næstu tónleikar hljómsveitarinnar verða þó í Portinu í Hafnarhúsinu en verkefnið verður of stórt fyrir Kjarvalsstaði.

18. ágúst 2008

Ligeti tónleikar Ísafoldar þann 8. ágúst voru vel heppnaðir í alla staði og tónleikasókn eins og hún gerist best, uppselt og setið í hverju sæti.  Við þökkum tónleikagestum fyrir komuna og þá frábæru stemmningu sem myndaðist á þessum tónleikum.

Næsta verkefni Ísafoldar er samstarfsverkefni með tónlistarmönnum og listamönnum sem sérhæfa sig á öðrum sviðum en Ísafold.  Við auglýsum tónleikana bráðlega hér á heimasíðu Ísafoldar. Ef þú ert ekki nú þegar á póstlistanum geturðu skráð þig hér.

06. ágúst 2008

Æfingar fyrir Ligeti tónleikana standa nú yfir og er útlit fyrir stórglæsilega og spennandi tónleika. Fimmtudaginn 07. ágúst verður safnið undirbúið fyrir tónleikana en verkin verða leikin  í nokkrum mismunandi sölum. Tónleikarnir verða kvikmyndaðir en það efni verður notað í kynningarmyndband um Ísafold sem stefnir á að kynna sig erlendis á næstu árum. Ekki missa af frábærri tónlist og flottum viðburði.

28. júlí 2008

Fréttatilkynningu um Ligeti tónleikana má hlaða niður héðan: Fréttatilkynning

Póstlistinn er kominn í gagnið, skráið ykkur með því að senda okkur e-mail á isafoldkammersveit@gmail.com (skrifið fullt nafn í póstinn)

Forsala á miðum fyrir næstu tónleika er hafin á www.midi.is en í forsölu er eingöngu hægt að kaupa miða á 2.500 kr. Þeir sem vilja kaupa miða á afsláttarverðinu (1.500 kr. fyrir námsmenn og eldri borgara) geta keypt  miða við innganginn á tónleikakvöldinu (Kjarvalsstöðum)

16. júlí 2008

Næstu tónleikar

LEITIN AÐ LIGETI - Föstudaginn 08. ágúst kl.20:00 - Kjarvalsstöðum


 

Efnisskrá
György Ligeti (1923-2006)
Metamorphoses Nocturnes (Strengjakvartett)
Melodien

HLÉ

Sex smástykki (blásarakvintett)
Kammerkonsert

Kaupið miða á http://midi.is eða við innganginn.
Almennt verð 2.500 kr
Námsmenn og eldri borgarar 1.500 kr

21. apríl 2008

Útgáfutónleikar Ísafoldar: all sounds to silence come

Miðasala er nú hafin á miði.is, Skífunni Laugaveg og Kringlunni og í verslun 12 Tóna á Skólavörðustíg fyrir útgáfutónleika Ísafoldar sem haldnir verða í Langholtskirkju sunnudaginn 27. apríl nk. Tónleikarnir eru haldnir í tilefni annarrar plötu sveitarinnar, all sounds to silence come, en platan er önnur í röðinni sem gefin er út hjá plötuútgáfufyrirtækinu 12 Tónum. Tónleikagestum gefst tækifæri að kaupa nýju plötuna í forsölu á tónleikunum, en þetta verður jafnframt uppskeruhátíð sveitarinnar og 12 Tóna sem fagna 5 og 10 ára starfsafmæli í ár.

Efnisskrá tónleikanna má sjá hér.

20. mars 2008

Kammersveitin Ísafold útnefnd Flytjandi ársins 2007!

Áfram heldur velgengni sveitarinnar, því að á Íslensku tónlistarverðlaununum sem haldin voru þann 18. mars sl. var Ísafold útnefnd Flytjandi ársins 2007 í flokki Sígildrar- og samtímatónlistar. Tilnefningarnar í þessum og öðrum flokkum má sjá á heimasíðu verðlaunanna hér, en þess má geta að hinir tónlistamennirnir sem bitust um sömu verðlaunin eru annarsvegar meðlimur Ísafoldar frá upphafi og hinsvegar góður samstarfsmaður í fyrri verkefnum.

Ísafold þakkar kærlega fyrir þennan heiður og óskar jafnframt hinum verðlaunahöfunum til hamingju!

4. janúar 2008

Kammersveitin Ísafold: Tónlistarhópur Reykjavíkur 2008

Kammersveitin Ísafold var valin Tónlistarhópur Reykjavíkur 2008 af Menningar- og ferðamálaráði Reykjavíkurborgar auk þess sem sveitin fékk tveggja milljóna króna styrk frá borginni.

Í greinargerð fagnefndar segir: „Ísafold kom nýlega fram á sjónarsviðið með miklum sprengikrafti og árið 2008 mun hún fagna sínu fimmta starfsári. Hljómsveitin, sem skipuð er ungu og efnilegu tónlistarfólki, hefur sýnt og sannað að hún hefur getu og vilja til þess að stuðla að áhugaverðri nýbreytni og þróun á sviði tónlistar. Einstakur metnaður einkennir fjölbreytta verkefnaskrá þeirra og samstarf við aðra listamenn, listgreinar og listastofnanir. Í byrjun ársins 2005 var Ísafold tilnefnd til Íslensku tónlistarverðlaunanna sem bjartasta vonin í flokki sígildrar tónlistar.“

Menningar- og ferðamálaráð Reykjavíkurborgar tilkynnti jafnframt hverjir hlytu þá 48 styrki sem veittir eru til verkefna og liststarfsemi 2008, samtals að upphæð 26 milljónir króna. Ráðið veitti styrkina að tillögu fagnefndar er skipuð var fulltrúum Bandalags íslenskra listamanna. „Það er búið að viðurkenna hversu dýrmætt það er að geta styrkt listahópa,“ sagði Margrét Sverrisdóttir, formaður Menningar- og ferðamálaráðs borgarinnar í viðtali við Morgunblaðið, „Mér finnst vera ánægja meðal fagfólks í listaheiminum með þessi vinnubrögð okkar,“ sagði Margrét sem taldi styrkina eiga eftir að gagnast vel. „Við erum að styrkja mjög framsækið fólk og vaxtabrodda í listaheiminum svo ég er mjög bjartsýn á að það komi mikið út úr þessum styrkjum.“

17. desember 2007

Söngvar jarðar: Öðruvísi Vínartónleikar í þriðja sinn í Íslensku óperunni

Þann 30. desember kl. 20 munu Kammersveitin Ísafold og Íslenska óperan standa fyrir Öðruvísi Vínartónleikum þriðja árið í röð. Að þessu sinni er röðin komin að einu af meistaraverkum 20. aldarinnar, Söngvum jarðar (Das Lied von der Erde) eftir Gustav Mahler (1860-1911). Tónskáldið sjálft taldi verkið sína persónulegustu tónsmíð en náði aldrei að heyra það flutt, þar sem hann lést áður en það var frumflutt. Í raun er um að ræða mikilfenglega söngsinfóníu sem sameinar þær greinar sem tónskáldið hafði mest dálæti á, sönglögum og sinfóníum. Í verkinu notast hann við gömul kínversk ljóð þar sem fjallað er um hverfulleika mannlegrar tilveru, gleði, sorg og söknuð.

Ísafold fær til liðs við sig tvær af okkar skærustu söngstjörnum af yngri kynslóðinni. Einsöngvarar eru Finnur Bjarnason, tenór, og Guðrún Jóhanna Ólafsdóttir, mezzósópran, en stjórnandi er Daníel Bjarnason.

Um Söngva jarðar eftir Gustav Mahler:

Á tónleikunum heyrist verkið flutt í kammerútsetningu sem tónskáldið Arnold Schönberg hóf á að gera en Rainer Riehn kláraði árið 1980. Útsetningin heyrðist upprunalega í Vínarborg á árunum í kringum 1920 á tónleikum „Félags um einkaflutning tónverka“ (Verein für Musikalische Privataufführungen), sem Schönberg stofnaði ásamt fleirum í Vínarborg árið 1918. Að því er best er vitað mun þetta vera í fyrsta skipti sem þetta verk Mahlers fær að hljóma í þessari útsetningu á Íslandi.

Miðasala er þegar hafin á heimasíðu Óperunnar og á www.midi.is. Vegna gríðarlegrar aðsóknar er betra að tryggja sér miða fyrr en seinna!

3. desember 2007

Þann 1. desember sl. fékk fyrsta plata Ísafoldar frábæra dóma frá gagnrýnanda Morgunblaðsins, og hlaut fjórar stjörnur af fimm. Í umsögn Jónasar Sen um plötuna segir m. a.:

„KAMMERSVEITIN Ísafold, sem Daníel Bjarnason stjórnar, er með langbestu tónlistarhópum landsins. Það hefur hún margoft sannað. Geisladiskur þar sem sveitin leikur verk eftir Bent Sørensen, Hauk Tómasson, Takemitsu og Schönberg er enn ein skrautfjöðurin í hatt hennar. Ekki aðeins er leikurinn vandaður og fullur af vel útfærðum blæbrigðum, heldur er túlkunin ávallt sannfærandi og í anda hvers tónskálds. Almennt talað svífur dulúð yfir vötnunum, The Weeping White Room eftir Sørensen er eins órætt og titill verksins gefur til kynna, en samt fullt af auðfundinni merkingu – sem þó er ekki nokkur leið að koma í orð. […]“

„Par eftir Hauk Tómasson er sömuleiðis glæsilega flutt og af ástríðu sem fer tónskáldinu mun betur en sú kalda vandvirkni sem stundum einkennir túlkun tónlistar hans. Óhætt er að mæla með þessum geisladiski fyrir þá sem hafa áhuga á dulúð og forneskju í nýrri tónlist.“

[Jónas Sen. Á leðurblökuvængjum söngsins, Morgunblaðið 01/12/07]

1. nóvember 2007

Fyrsta plata Ísafoldar, sem kom út í mars sl., er nú fáanleg í öllum helstu plötubúðum landsins á SACD formi (Super Audio CD), sem styður fjölrása spilun. Næsta plata Ísafoldar, sem inniheldur m. a. verk eftir Arvo Pärt, Alfred Schnittke og nýtt verk eftir Daníel Bjarnason, er nú í hljóðvinnslu og áætlað er að hún verði gefin út í febrúar 2008.

Ísafold kemur næst fram á Öðruvísi Vínartónleikum þann 30. desember nk. í Íslensku óperunni, en þetta verður í þriðja skiptið sem tónleikar af þessu tagi eru haldnir. Á tónleikunum verður flutt Das Lied von der Erde eftir Gustav Mahler og einsöngvarar verða Finnur Bjarnason, tenór, og Guðrún Jóhanna Ólafsdóttir, mezzosópran. Nánari upplýsingar um tónleikana og miðasölu verða birtar hér þegar nær dregur!

8. ágúst 2007

Miðasala er þegar hafin á www.midi.is fyrir tvenna tónleika Ísafoldar í Langholtskirkju þá 15. og 16. ágúst nk. kl. 20:30. Tónleikarnir eru styrktir af VISA á Íslandi, en Ísafold hlaut nýverið styrk frá Menningarsjóði Visa. Einleikarar á tónleikunum verða Elfa Rún Kristinsdóttir fiðla, Bragi Bergþórsson tenór og Víkingur Heiðar Ólafsson píanó, en þau eru jafnframt fyrrum styrkhafar Menningarsjóðsins. Efnisskráin er glæsileg og inniheldur m. a. verk eftir Saint-Saëns, Stravinsky, Beethoven og nýtt verk eftir stjórnanda sveitarinnar, Daníel Bjarnason, sem var frumflutt 4. ágúst sl. á Sumartónleikum í Skálholtskirkju. Strax er orðið uppselt á fyrri tónleika, en enn er hægt að tryggja sér miða á seinni tónleikana, fimmtudaginn 16. ágúst. Miðaverð er 2.500 kr. en 1.500 kr. fyrir VISA-korthafa.

Efnisskrá:

Arvo Pärt (1935): Fratres (1977)
Benjamin Britten (1913-1976): þjóðlög
Igor Stravinsky (1882-1971): Ragtime (1917-1918)
Camille Saint-Saëns (1835-1921): Romance op. 48 (1874)

HLÉ

Ludwig van Beethoven (1770-1827): "Pathétique", píanósónata nr. 8 í c-moll (1797-1798)
Vaughan Williams (1872-1958): úr "On Wenlock Edge" (1908-1909)
Daníel Bjarnason (1979): Öll hljóð bíða þagnar (2007)

Ísafold-kammersveit
Einleikarar: Elfa Rún Kristinsdóttir fiðla, Bragi Bergþórsson tenór, Víkingur Heiðar Ólafsson píanó.
Stjórnandi: Daníel Bjarnason

2. ágúst 2007

Ísafold æfir nú í Skálholti og undirbýr sig fyrir ferna tónleika næstu helgi, Verslunarmannahelgina, á Sumartónleikum í Skálholti, þar sem m. a. verður frumflutt glænýtt verk eftir Daníel Bjarnason, stjórnanda Ísafoldar. Í framhaldi af því fer sveitin í upptökur fyrir plötu sem gefin verður út í byrjun næsta árs. Hér að neðan má sjá tímasetningar og efnisskrár nk. tónleikahelgi Ísafoldar:

Laugardagur 4. ágúst kl. 17:00: Da pacem Domine
Laugardagur 4. ágúst kl. 21:00: In memoriam
Sunnudagur 5. ágúst kl. 15:00: Da pacem Domine
Mánudagur 6. ágúst kl. 15:00: In memoriam

1. ágúst 2007

Velkomin á nýja heimasíðu Ísafoldar-kammersveitar! Eins og sjá má hefur síðan farið í mikla andlitslyftingu. Síðan er þó enn í vinnslu og verður t. d. bráðum hægt að hlusta á tóndæmi af nýjustu plötu Ísafoldar sem gefin er út hjá 12 Tónum. Njótið vel.